Kuliapis nga Ay-ay

It's been a while since I last posted an Ilokano (my mother tongue) piece here. Allow me please.





Makasiram ti apuy a sumgiab iti kaunggan ni ngata-ngata
Ket puoranna ti simbeng ti panagdaliasat ti agduadua a kararua
Dagiti agkatangkatang a dapan nga inulila ti nailibay a darepdep
Nga indaramudom ti kasipngetan, inadipen nagkaadu a derrep.

‘Di madaeran kuyep a mata ti makipinnerreng iti masakbayan
A tagtagibien aliaw impasngay kalman a di man la nagbalasang
Iduduayyan’ pilay nga agdama a nagpanawan narasi a namnama
Ilallallay saning-i ti dung-aw dagiti umar-arubayan nga aligaga.

Madaeranto ngata ti kired ni Elpis ti bang-i ti espiritu ni Moros
A nangkaras ubbog ni talinaay, nangruros sabong ti kurkuros
Idinto nga agsung-aben dagiti kalman a ramut a baglan ni puot
A dalanen koma dagiti sagibsib ngem inalun-on metten ni pungtot?

Uray la agallangogan dagiti sennay ti nakas-ang a pannakapaay
Ngem saan met a sumngaw dagiti boses ti kuliapis nga ay-ay.


Check out other version HERE. Or, read my other ATTEMPTS at poetry HERE.

//Sherma E. Benosa
09 May 2008; 10:15pm

PAGARIEK KADI?

Pagariek kadi't bitek ti kaunggak
Ket isemak ididiayam nga ayat
Ta kayatko metten nga agsarday
Nasalemsem a rabii; isem a natamnay?

Ngem kasano no sika ket maysa
A batibat, mangay-ayam kararua;
Sipnget a mangisangbay al-alia
Naruay a samuyeng ken lulua?

Kunaekto kadi lattan iti bagik
Tunggal umapayka iti lagip:

Balay a diak koma pinagnaedan
Tagilako a diak koma ginatang
Sarsuela a diak koma binuya
Aweng a diak koma inggin-gina?


Pagariek kadi't buteng iti kaunggak
Tapno saem ken panaas maliklikak
Ta diak kayat nga aglangeb ti langit
A makipagrikna iti puso a masakit?

Ngem kasano no sika ket maysa
Nga ayat, mangbiag puso a naiwawa;
Ima a nalailo, mangisangbay namnama
Napnuan kaipapanan nga agsapa?

Kunaekto kadi lattan iti bagik
Tunggal umapayka iti lagip:

Napintas a libro a diak binasa
Nangayed a buya a diak kinita
Umno nga addang a diak insayangkat
Napateg a sagut a diak inawat?


//Sherma E. Benosa
13 October 2007; 12:35pm

NANGLIPAT A KARI

Bay-am nga ipasimudaag
Di pay namurmurayan a bigat
Salemsem naglabas a rabii
Inkur-it dagiti nanglipat a kari.

Kari nga intedmo, napnuan sudi
Linagam a balikas, naumbi;
Kasla nalamuyot a dayyeng
Gayam, manglimlimo a samuyeng.

Bay-am nga iparangarang
Ti nakamirduot a tangatang
Dagensen simmangbay nga agsapa
Intugkel dagiti ubbaw a sapata.

Sapata nga impaidulinmo, nalailo
Insawangmo a sao, nadungngo;
Kas da la namsek a binatog
Gayam, daniw a ‘di makabsog.


//Sherma E. Benosa
13 October 2007; 1:04am

SIKA AMANG (ROMAN)

Natibkerka nga inkam’ nagsadagan
Iti naunday a panawen sika’t kamang
Adigi a nalinteg, naanus a nangiwanwan
Sarikedkedmi, sika laeng Amang.

Sika daydi bukel nagdisso nadam-eg a daga
A rimmusing, nagagawa ket rimmangpaya
Sika ti puon dagiti amin a nagtagisanga
Nga apon dagiti tumatayab; agawidda kenka.

Sika ti urat pagtalaytayan naruay a taraon
Maibisibis kadagiti sanga ken kadagiti bulong
Sika ti sappupo dagiti bunga ken sabong
Nabsogda’t pammagbaga, ta sikat’ salinong.

Palubusannak nga agkurno kenka, Amang
‘Toy bungat’ saringitmo, itandudona 'ta nagan
Iti agnanayon sika ti innak pagtamedan
Tibker pammatim, isu’t innak pagtaklinan.


//Sherma E. Benosa; April 12, 2007; 11:07pm
For myAmang, Roman Bona Benosa
on his 88th birthday, March 28, 2007

Mental exercises (for the heart)

Writing is also another form of mental exercise. Besides driving your demons away, weaving words helps keep your mind in tip top shape.

Lately, myTatang and I have turned our attention to writing poems. But here’s the catch. I would write a poem for him (in Iluko), and he would write me one, using the title I’ve used.

Let me share our works with you.


LUGAR A NAIKARI
(My Poem)
(March 24, 2007; 5:30am)

Awan kaimudingan
Ladingit ni lagip
Nga umay sumallisallin
Mangburibor iti isip
Ta addaka a mangibabaet
Mangipalpalagip
Ayat ken karin-kari
Dua puso a naglantip.

Ni napudno nga ayan-ayat
Adu a tagainep inna linaga
Nga mangitundanto iti dalan
Agturong kenni inanama
Tapno makadanontanto
Nga awan sawsawirna
Iti dayta lugar a nangayed
naikari para kadata.

Idiay, adunto dagiti sulisog
Ngem dakkelto met ni talek
Idiay adunto dagiti ublag
Ngem saantanto ida italtalek
Idiay adunto dagiti rigat ken suot
Ngem pagbinnuligantanto ida a risuten
Idiay adunto’t anay a mangrakrak
Ngem ditanto ida pagballaigien.

Ta idiay nabuslonto met ti ayat
Kasta met ti panagpinnateg.
Idiay aglaplapusananto iti garakgak
Awanto’t adu a sasaibbek.
Idiay nabuslonto ti isem
Awanto’t adu a sangsangit
Ta idiay, duatanto laeng
Ditanto ammo ti agladingit.

Wen Dungngo
Awanto kaimudingan
Ladingit ni lagip
Mabainto nga umay sumallisallin
Mangburibor iti isip
Ta datanto a dua iti agpinnalagip
Ayat ken karin-kari
Dua puso a naglantip.


NAIKARI A LUGAR
(myTatang’s Poem)
March 26, 2007

Bay-am nga idiay lugar a naikari ket innakto akilisen
ni dagidagi’n ayat, pudot barukongko’t mangtagiben
ken manglagda kenni Kari tapno inna buangayen
ni namnama ken panagtinnalek ket inna pagrusingen.

Bay-am nga idiay lugar a naikari ket innakto itukit
dagiti bin-i ni namnama, kaduak nga agsibog ni Langit
tapno ti dalanmo ket nalasbang – uray addanto pait
bumangonka a sisasantak, dupirem dagiti palso a karit.

Bay-am nga idiay lugar a naikari ket innakto irakurak
timek ni Panagtalek, ayatko kenka innak ipaduyakyak
diakto denggen tanabutob ni umsi wenno ublag dagiti salaksak
ta dagita balikasmo Sherma, iti agnanayon, isunto’t dumngegak.

Bay-am nga idiay lugar a naikari ket ilemmak ti tugot
ti Anghel a kagabayko tapno punasenna dagiti ut-ot
ni pasidumri-ni-ilem ket maandingay rigat ni subbot
tapno maiyaon nagkammayet-dua-a-puso kenni tuok.

Bay-am a sangalek ti pakarso ni panangipateg nga ingget sudi
ken lagaen dagiti tagainep, kinasimbeng ni ayat ti mangtagibi
ket imdengamto ti samiweng ni duayya, ramayko’t nangtibbi
ta ngamin ayatko, sikanto laeng ti kaduak idiay lugar a naikari.


Here’s another set of poems…


BUKEL
(My Poem)
March 29, 2007

Nalamiis ‘ta dakulap
a nangitukit iti bukel.
Ket ni ayat
Nagrusing a nagsantak;
dimmakkel.

Kasla idi laeng kalman
a ti daga kimraang.
‘Di na kayat
ti makali, agsangit
a mamulaan.

Kasla idi laeng rabii
a nalusiaw dagiti bituen.
Mabainda a rummuar
ta ti rimatda
nalidem.

Kasla itay laeng bigat
a kimleb ni apo init.
Masadut a sumingising
ta dagiti rayana
kimriit.

Ngem ita pati puso
a nanglaylay, simmaranta
Kas iti bukel nga intukit
nalamiis a dakulap
iti nadam-eg a daga.


BUKEL
(myTatang’s Poem)
(April 1, 2007)

Ti bukel nga intukitko
a sinibugak iti lailo,
ayat ti pinangaladko,
dungngo’t pinangtarakenko
simmantak, rimmungbo
ket saanto pulos agpullo.

Kayawakto ti panawen
ikiddayda’t talingenngen
kadagiti rabii ni umbi
wenno tiempo’t saning-i
ket mataginayon ni lailo
iti bukel nga intukitko.

Balasang ti Bambang

Kansionanka man, O balasang ti Bambang
balasang a napintas nga innak pagrukbaban
itoy nga aldaw nga inka panagkanaganan
panagtaom, ita ken iti agnanayon, diakto kalipatan.

Isagutko kenka toy ayatko a nagpaiduma
bitbituen sadiay langit, purosekto amin ida
inayonko diay bulan aramidekto a kas korona
nga ibalangat dita ulom, selnaganna ‘ta sadia.

Iyawatko a naimpusuan dagiti pinilik a rosas
karagupna metten dagiti napudno nga arasa-as
ti talingenngen ni Kari, saanto a manasanas
panangtagiben kapia-ni-tulag, dinto pulos agkupas.

Itden koma ti Apo ita nga aldaw a panagkasangaymo
pannakataginayon ni ragsak, regta, salun-at ken dungngo
ni pangipateg ken ni Ayat, agsadag dita barukongmo
tapno inta manibi dagiti tarigagay ken kari ti dua-a-puso.

Kansionanka ngarud O Pintas ti Bambang
sapata ni kinapudno dim’ to koma kalipatan
ta awanton sabali nga innak tarigagayan
no di ‘ta ayatmo, Anghel nga innak pagraywan.


Birthday song from Mr. Clifton Pascua

Nagulimek Dagiti Billit Tuleng

Naulimek ti angin, kumkumpasanna’t aweng
Ken sagawisiw dagiti billit tuleng
A dangdanggayan met dagiti bulong
Mangliklikmot naiisem a sabsabong
A mangpaypayapay, mangaw-awis kenka
Tapno makipagragsakka kadakuada.

Immisemka, ngem apay a napait
Naibus kadin isemmo a nasam-it
Imbunbunongmo kadagiti papagayam
Inarub-obda kadin a naminpinsan?
Naatianan kadin daydi bubon
Pagsaksakduan isemmo naruay a kas danum?

Idiay laud, aggargarakgak ti init
Mangbuybuya mulmula a masinsinit
‘Di mangikankano kadagiti sangit a maip-ipit
Ken rungaab dagiti mula a naiburang-it
Agpapaarayat, dumawdawat iti asi
Sangkabassit a danum a maiwarsi.

Naikulengka, ngem apagapaman laeng
Ta pagamuan adda nangikut kenka nga aweng
A nangidiktar iti aramidem. Wen, gayyem
Luam nagarubosda, ket dagiti mula nagungarda
Ngem anian, saanmon a nakita nasam-it nga isemda
Ta idin, pagayam, ket naglusdoyka.

Nagulimek metten dagiti billit tuleng.


Sherma E. Benosa
March 20, 2007

BNSFIT (SHERMA)

Kas iti agmatuon, sinurotko ti dalan ni kinadangkok
a mangsapul ti kalintegan daydi nasaktan a pusok.
Sinurotko ti desdes ni karemmengan a mangkutikot
iti kailugaran dagiti panagsagaba, awan sarday a tuok.
Inem-emak ni saem ken pannakailuya, tinagibik dagiti pait
a nangpatibker iti Bato tapno agtulidtulid a mangidalit.
Linipatko ti kaipapanan ni ayat tapno ti gagem
ni napasugkian nga abrasa, rason ni apas innak matagikua.
Naglemmesak kadagiti alimpatok dagiti nagarampang a silaw
tapno pilitek a lipaten dagiti nasanaang ken kawaw a kalgaw.
Sinapulko dagiti sungbat dagiti saludsod ni napukaw nga ayat
a mabalin a naikitikit iti langit wenno iti tapok a naisurat.
Dinaliasat ko dagiti saan pay a naimaldit a langalang
tapno mautob dagiti nabannogen a gasatko a naawan.
Kumuyogak koma kadagiti raya ni Init nga agdisso
iti barukong ni mangliwengliweng nga adayo.
Ngem patiek ngata nga itundanak iti lugar ni talina-ay
tapno sanguek ni inana, lipatekon tuok ken upay?
Adda kadi kaimudingak a dumawat iti pannaka-awat
ken agpatulong a manglagda’t agrakayan adigi ni Tangig?
Tapno ti natda a lawag pilitek a sapulen ken supusopan,
dagiti nagkurangak kenni naiwawa a tulag ni Puso.

— VF

Iluko "works"

II.

Narimat
Nalawag
Ti isip
Kas karimat
Ken kalawag
Ni Apo init
Narimat
Nalawag
Kas karimat
Ken kalawag
Ti isip.

Ti isip
kas
ti init
kas
ti isip.