Saturday, October 13, 2007
PAGARIEK KADI?
Pagariek kadi't bitek ti kaunggak
Ket isemak ididiayam nga ayat
Ta kayatko metten nga agsarday
Nasalemsem a rabii; isem a natamnay?
Ngem kasano no sika ket maysa
A batibat, mangay-ayam kararua;
Sipnget a mangisangbay al-alia
Naruay a samuyeng ken lulua?
Kunaekto kadi lattan iti bagik
Tunggal umapayka iti lagip:
Balay a diak koma pinagnaedan
Tagilako a diak koma ginatang
Sarsuela a diak koma binuya
Aweng a diak koma inggin-gina?
Pagariek kadi't buteng iti kaunggak
Tapno saem ken panaas maliklikak
Ta diak kayat nga aglangeb ti langit
A makipagrikna iti puso a masakit?
Ngem kasano no sika ket maysa
Nga ayat, mangbiag puso a naiwawa;
Ima a nalailo, mangisangbay namnama
Napnuan kaipapanan nga agsapa?
Kunaekto kadi lattan iti bagik
Tunggal umapayka iti lagip:
Napintas a libro a diak binasa
Nangayed a buya a diak kinita
Umno nga addang a diak insayangkat
Napateg a sagut a diak inawat?
//Sherma E. Benosa
13 October 2007; 12:35pm
Labels:
Iluko Poems (Daniw)
Subscribe to:
Post Comments (Atom)
No comments:
Post a Comment